1.
أنا يا ناس تعبان ونفسي يرتاح بالي
باجري مش همدان في شقا مش تسالي
نفسي أكون شبعان زي الناس العلالي
والجيب يبقى مليان أعيش أتعزز بمالي
وأهني بيتي كمان بالرزق اللي جالي
والدار يبقى عمران بأثاث شيك وغالي
وأنام وأنا رضيان أهدا وأبطل الالي
ولا أحط في الحسبان هموم اليوم التالي
صحيح أنا تعبان إمتى يرتاح بالي
2.
فرجت وكترت الفلوس والشغل عال العال
وبنيت لي بيت مخصوص وكسيت العيال
وبقيت بالمال مهووس في المشاريع شغال
في دوامة مغروس وخايف على راس المال
اللي شغال واللي مكنوز دايما شاغل البال
وإن خسرت أبقى مفروس وأبكي اللي جرالي
وأنا زي ما أنا متعوس نفسي يرتاح بالي
3.
قلت يا رب يا كريم يا ناظر للغلابة
يا مراعي المساكين وحافظ م الديابة
يا مداوي العيانين وملاحظ التعابى
ده أنت وحدك أمين والدنيا دي كدابة
هاينفع غيرك مين إن خنتك خيابة
جربت توب الدين ولسة قلبي خرابة
كل ماحاول استقيم ماشوفش استجابة
يا رب تعبت كتير أرجوك ريح بالي
4.
يا حبيبي يا غالي أنا حاسس بيك
وشايف صراعك والحزن اللي فيك
وفي كل ضياعك كانت عيني عليك
تعاللي بعلتك أنا أعرف أستر العيب
ده أنا اللي فديتك بدمي على الصليب
صدق إنك خاطي والخطية تسيب
وافهم اني العاطي يكون لك نصيب
وافتح قلبك لي بسرعة ها استجيب
وتاخد مني هدية سلامي العجيب
تتغير كل أحوالك وكمان يرتاح بالك
5.
طلبته من كل قلبي فعطاني قلب جديد
سلمته كل كياني وبقي سيدي الوحيد
رجعت لحضن الراعي بعد ما كنت بعيد
يا ناس تعالوا هنوني أخيرًا صرت سعيد
دقت طعم البهجة والفرح اللي نوعه مجيد
حبه ده بقى راس مالي أغنى وأهم رصيد
والعيشة بقت تهنا لي وأيامي كلها عيد
وخلاص إرتاح بالي وسلامي فريد وأكيد